فِیۡ سِدۡرٍ مَّخۡضُوۡدٍ ﴿ۙ۲۸﴾

۲۸۔ وہ بے خار بیریوں میں،

وَّ طَلۡحٍ مَّنۡضُوۡدٍ ﴿ۙ۲۹﴾

۲۹۔ اور کیلوں کے گچھوں،

وَّ ظِلٍّ مَّمۡدُوۡدٍ ﴿ۙ۳۰﴾

۳۰۔ اور لمبے سایوں،

30۔ وَّ ظِلٍّ مَّمۡدُوۡدٍ :لمبے سائے۔روایت کے مطابق یہ سائے ایسے ہوں گے، جیسے جو طلوع فجر سے طلوع آفتاب کے درمیانی حصے کا سایہ ہوتا ہے: ان اوقات الجنۃ کغدوات الصیف لا یکون فیہ حرولا برد (بحار الانوار 8: 109) جنت کے اوقات موسم بہار کی صبح سویرے کی طرح ہوں گے۔ نہ گرمی نہ سردی۔

وَّ مَآءٍ مَّسۡکُوۡبٍ ﴿ۙ۳۱﴾

۳۱۔ اور بہتے پانیوں،

وَّ فَاکِہَۃٍ کَثِیۡرَۃٍ ﴿ۙ۳۲﴾

۳۲۔ اور فراوان پھلوں میں ہوں گے،

لَّا مَقۡطُوۡعَۃٍ وَّ لَا مَمۡنُوۡعَۃٍ ﴿ۙ۳۳﴾

۳۳۔ جو نہ ختم ہوں گے اور نہ ان پر کوئی روک ٹوک ہو گی۔

32۔33۔ جنت کے میوے کسی موسم کے ساتھ مخصوص نہیں ہوں گے، نہ ہی وہاں کوئی روک ٹوک ہو گی اور نہ میوے حاصل کرنے کے لیے درختوں پر چڑھنے اترنے کی مانند دیگر زحمتیں ہوں گی۔

وَّ فُرُشٍ مَّرۡفُوۡعَۃٍ ﴿ؕ۳۴﴾

۳۴۔ اور اونچے فرش ہوں گے۔

اِنَّاۤ اَنۡشَاۡنٰہُنَّ اِنۡشَآءً ﴿ۙ۳۵﴾

۳۵۔ ہم نے ان (حوروں) کو ایک انداز تخلیق سے پیدا کیا۔

فَجَعَلۡنٰہُنَّ اَبۡکَارًا ﴿ۙ۳۶﴾

۳۶۔ پھر ہم نے انہیں باکرہ بنایا۔

36۔ جو ہمیشہ کنواری رہیں گی۔ یہ اسی خاص انداز تخلیق کا خاصہ ہے۔

حدیث میں آیا ہے کہ ایک بوڑھی عورت نے رسول اللہ صلى‌الله‌عليه‌وآله‌وسلم سے درخواست کی کہ دعا کیجیے میں جنت میں داخل ہو جاؤں۔ رسول اللہ صلى‌الله‌عليه‌وآله‌وسلم نے فرمایا ان الجنۃ لا یدخلھا العجائز ۔ جنت میں بوڑھی عورتیں داخل نہیں ہو سکتیں۔ وہ عورت روتے ہوئے چلی گئی۔ آپ صلى‌الله‌عليه‌وآله‌وسلم نے فرمایا: اخبروھا انھا لیست یومئذ بعجوز (زبدۃ التفاسیر 6: 572) اس کو بتا دو کہ اس دن وہ بوڑھی نہ ہو گی۔

عُرُبًا اَتۡرَابًا ﴿ۙ۳۷﴾

۳۷۔ ہمسر دوست، ہم عمر بنایا۔