31۔ عورتوں کے لیے بھی یہی حکم ہے کہ وہ غیر مردوں کی طرف عمداً نہ دیکھیں۔ چنانچہ حضرت ام سلمہ و حضرت میمونہ کا واقعہ مشہور ہے کہ جب ابن ام مکتوم رسول اللہ ﷺ کی خدمت میں داخل ہوئے تو آپ ﷺ نے دونوں سے فرمایا : پردہ کرو۔ بیبیوں نے عرض کیا: یا رسول اللہﷺ! کیا وہ اندھے نہیں ہیں؟ وہ نہ ہمیں دیکھیں گے، نہ پہچانیں گے۔ فرمایا: کیا تم دونوں بھی اندھی ہو؟ کیا تم دونوں انہیں نہیں دیکھ سکتیں؟

اِلَّا مَا ظَہَرَ مِنۡہَا ۔ سوائے اس کے جو ظاہر ہے۔ احادیث کے مطابق چہرہ اور دونوں ہاتھ کلائیوں تک اور دونوں قدم مراد ہیں، اگر کوئی دوسری روایت اس کے معارض نہ ہو۔ وَ لۡیَضۡرِبۡنَ اور اپنی اوڑھنیاں اپنے سینوں پر ڈالے رکھیں۔ دور جاہلیت میں عورتیں اپنے سینوں کو کھلا رکھتی تھیں۔ اس آیت میں یہ حکم آیا کہ جس چادر سے عورتیں اپنے سروں کو چھپاتی ہیں ان سے سینوں کو بھی چھپائیں۔ رہا چہرے کا مسئلہ کہ اس کا چھپانا واجب ہے یا نہیں تو یہ اس آیت سے ثابت نہیں ہوتا، مگر یہ کہ مَا ظَہَرَ مِنۡہَا کی تفسیری روایات کو قبول کیا جائے۔

یہ بات فقہاء پر موقوف ہے کہ وہ روایات و سیرت سے کیا حکم ثابت کرتے ہیں۔ ان مردوں سے پردہ کرنے کی ضرورت نہیں جن میں جنسی رغبت نہیں ہے اور ان بچوں سے بھی جن کی جنسی رغبت ابھی بیدار نہیں ہوئی۔